Eggjanúðlur með sætum kartöflum og papriku

Afsakið lélega mynd, Canon vélinni minni var stolið.

Ákvað að láta loksins verða að því að elda eggjanúðlur. Það er alveg ótrúlega auðvelt að gera fínar núðlur, ég svosem veit ekki hvort aðferðin sem ég notaði er „hin eina rétt“ en þetta virkaði. Rétturinn er fyrir 1 – 2.

Innihald:
1 pk Núðlur
1/2 Sæt Kartafla
1 stk. Paprika
1 Egg
Smá Engiferrót
Basil
Pipar
Soyjasósa
Olífuolía

Aðferð:
Ég notaði rifjárn til að saxa niður sætu kartöfluna og paprikuna ( það var þá sem ég áttaði mig á að betra er að fínsaxa paprikuna bara ).

Hitið pönnu með olíu og saxaðri engiferrót á miðlungshita. Bætið núðlunum ásamt bolla af vatni á pönnuna. Þegar núðlurnar eru nokkurn vegin orðnar mjúkar þá skellti ég einu eggi á og hrærði saman við núðlurnar.

Að lokum bætti ég grænmetinu við, skellti soyjasósu, basil og pipar í blönduna. Hrærði öllu með spaðanum og át með bestu lyst.

Eggjakaka með sveppum og lauk

Ég er alveg skelfilegur í að gera eggjakökur. Fyrst og fremst er það vegna þess að ég er ekki mikill aðdáandi eggja. Mér bara finnst bragðið af eggjum ekki gott og skil ekki fólk sem getur borðað þau í miklu magni.

En egg eru holl í hófi og auk þess mjög ódýr. En í kvöld sá ég í ískápnum eggjabakka sem þurfti að fara að klára og ákvað því að gera eggjaköku.

Innihald:
3 Egg
200g Sveppir
1 Stór laukur eða rauðlaukur
2x lúkufylli af raspi.
Ostur í sneiðum eða rifinn
Helling af pipar til að losna við eggja bragðið, karrí og kryddjurtir að eigin vali.
Ég nota ólífuolíu

Aðferð:
Ég setti bara sveppina og laukinn í matreiðsluvél og saxaði þar en það er líka bara hægt að skera niður. Allt er þetta sett í skál og þremur eggjum blandað við.

Hrærið saman með sleif og bætið við pipar og karrí á meðan. Næst er svo raspi/brauðmylsnu blandað við þangað til þetta er orðið nokkuð þéttur massi. Því næst er þessu skellt á pönnu með smá olíu og leift að steikjast örlítið áður en eggjakökunni er snúið við.

Þá er um að gera að strá smá ost yfir og pipra aftur. Því næst er kakan brotin saman með ostinn í miðjunni og leyft að vera á pönnunni þar til hún er steikt í gegn.

Berið fram með salati eða hrísgrjónum. Ætti að nægja fyrir 2 – 3 með meðlæti.

Mest niðurdrepandi matreiðslubók í heiminum …

Ég vill reyndar ekki djöflast of mikið á þessari konu því ég skil hana mjög vel. Það er oft alveg ótrúlega leiðinlegt að elda aðeins fyrir sjálfan sig. En þessi bók er samt sem áður frábær því hún beinir fólki sem er mikið eitt heima allavega frá skyndibita.

En maður getur ekki annað en gert smá grína af bók sem heitir „Microwave cooking for one.“ Það er eitthvað svo sorglegt við að borða einn. Miklu meir en helmingurinn við það að borða er að njóta félagsskaps með öðru fólki.

Þeir sem vilja kynna sér bókina „Microwave cooking for one“ geta skoða Facebook síðu bókarinnar og séð myndbönd

Kjúklingasúpa með sýrðum rjóma og tortillaflögum

Það var margt um manninn hjá okkur í kvöld. Helga systir Birgittu og vinir hennar voru að hjálpa henni að flytja. Eftir marga tíma af púli var loks boðið upp á kvöldmat. Í matinn var kjúklingasúpa með sýrðum rjóma og tortillaflögum.

Frekar auðvelt að elda, og auðvelt að nota bara það sem er til, en hér er uppskrift kvöldsins. Alls borðuðu sex hjá okkur og þessi uppskrift nægir fyrir þann fjölda. Það voru smá afgangar þannig að ég myndi alveg vera óhræddur við að bjóða 6 – 8 í mat.

Innihald:
2 stk Lauk
1 matskeið af Rauðri Chillipúrru
50g. Spínat
1 stk Paprika
1/3 Hvítkálshaus
200g Tómatar
2 bollar Smjörbaunir ( ca. 1 dós )
2-3 Kjúklingabringur
2 Dósir Kókosmjólk ( 800ml. )
Pipar, basil og grænmetiskraftur
Ég nota Ólífuolíu

Meðlæti:
Tortillaflögur
Sýrður rjómi

Aðferð:
Ef þið notið þurkaðar smjörbaunir þarf að leggja þær í bleyti daginn áður og sjóða svo í um það bil klukkutíma. Ef það er búið þá er bara að fara í að saxa niður allt grænmetið. Byrjið á að skera laukinn og paprikuna í bitastærð eftir smekk. Saxið svo spínatið niður. Þessu er svo öllu skellt í pottinn með olíu og steikt saman á lágum hita ásamt pipar eftir smekk.

Á meðan er hægt að saxa niður hvítkálið og bæta við blönduna. Hrærið vel í þessu í 2 – 3 mín. Næst er vatni bætt við þartil það þekur rétt yfir allt grænmetið. Því næst er krafti og basil bætt við og hrært öllu saman. Kjúklingabringurnar eru svo lagðar ofan á þetta allt og lok sett á pottinn. Leyfið þessu að malla í ca. 30 mín. Þetta gefur kjúklingabringunum gott bragð þar sem þær gufusjóða í súpugrunninum.

Þegar bringurnar eru orðnar eldaðar í gegn eru þær teknar úr pottinum og skornar í bita. Ég hef bitana oftast í stærra lagi.

Að lokum er svo kókosmjólkinni bætt útí og hrært við. Þessu er svo leyft að malla í aðrar 10 mín. Áður en þetta er borið fram er gott að smakka súpuna og krydda til.

Fyrir þá sem vilja eru tortillaflögurnar brotnar niður og settar í súpuna ásamt sýrðum rjóma.

Pizza með hvítlauk og spínat

Systir hennar Birgittu borðaði með okkur í kvöld. Þegar við Birgitta bjuggum úti áttum við það til að kaupa pizzu með spínat og hvítlauk. Það er varla hægt að segja að við söknum mikið af mat frá Bretlandi, þó eru nokkrir veitingastaðir sem maður saknar að fara og borða á. Fæstir þeirra eru reyndar Breskir, við bjuggum svo vel að búa í innflytjendahverfi þar sem hægt var að fá mat frá öllum heimsálfum. Hefðbundið Breskt mataræði var því aldrei til staðar hjá okkur.

Við ákváðum í kvöld að gera tilraun til að elda þessa pizzu sem við keyptum svo oft. Hún tókst nokkuð vel en var þó ekki alveg eins. Það kemur bara í næstu tilraun.

Við keyptum tilbúið pizzudeig þótt einfalt sé að gera það sjálfur. Við eigum ekki til kökukefli þannig að ég notaði rauðvínsflösku til að fletja deigið vel út. Pizzan er best ef hún er þunn, þetta virkar illa sem einhverskonar hleifur með dóti ofaná, eins og er svo algengt með pizzur á Íslandi.

Þetta myndaðist ekki nógu vel en bragðast ágætlega, ekki láta myndina stoppa það að uppskriftin sé prófuð.

Innihald:
50 g Spínat
2 lauf af hvítlauk
Pipar og örlítið af basil ef er til
Pizzasósa á botninn
Rifinn Ostur
Ég nota ólífuolíu

Aðferð:
Saxið spínatið niður ásamt hvítlauknum og steikið létt á pönnu með pipar og ólífuolíu. verið dugleg að hræra í þessu til að það brenni ekki við. Á meðan er hægt að hnoða botninn og fletja út.

Stillið ofninn á 150C undir og yfir, og leyfið ofninum að hitna. Á meðan er gott að setja sósuna á botninn, því næst er spínat og hvítlauknum dreift jafnt yfir og að lokum rifnum ost, ásamt smá basiliku.

Massa góð pizza.

Pasta með spínat og papriku

Síðasta þriðjudag var pasta í matinn hjá mér. Það er einfalt að elda og ódýrt. Birgitta var farin í vinnuna þannig að ég eldaði bara fyrir sjálfan min. Uppskriftin er fyrir einn.

Innihald:
Væn lúka af Spínat
1 stk. Rauð paprika
1 bátur af hvítlauk
1 bolli af pasta ( ég notaði pene )
2 bollar vatn
Í gær átti ég smá blómkál sem ég vildi nota og bætti við, það er ekki nauðsynlegt
Kraftur og pipar
Ég nota Ólífuolíu

Aðferð:
Skerið Spinatið, hvítlaukinn og paprikuna niður í litla bita og steikið á pönnu við lágan hita. Piprið aðeins til. Eftir nokkrar mínútur er svo tveim bollum af vatni ásamt pastanu bætt við. Þessu er hrært saman.

Næst er lokið sett á pönnuna og þessu leyft að malla þartil pastað er soðið.

Gott að bera þetta fram með hvítlauksbrauði.

InDefence kássa úr Íslensku rótargrænmeti, framreidd með rembing og lýðskrum

Icesave er heitasta málefnið þessa dagana. Ólafur Ragnar hefur boðað til blaðamannafundar í fyrramálið þar sem hann ætlar að greina frá ákvörðun sinni. Ég ákvað í tilefni þess að gera kássu sem er svo stútfull af þjóðarembingi að hægt er að fá nánast allt í hana án innflutnings. Kássuna skýri ég í höfuð InDefence.

Kássan er ódýr að vanda og þægileg ef ekki er stemming fyrir mikilli máltíð. Gott að venja sig á nægjusemi sem fyrst ef af verður að forseti skrifar ekki undir Skítsæmileg er í raun besta orðið til að lýsa henni.

Uppskriftin er fyrir einn.

Innihald:
1 stk. Laukur
3 stk. Gulrætur
150 g. Hvítkál eða rósakál
1 bolli Mjólk, Rjómi eða Kókosmjólk
1 bolli vatn
Grænmetiskraftur
Grófur pipar og Chillipipar
Ég nota ólífuolíu en hvers vegna ekki að tapa sér og nota bara innlendan tólg!

Aðferð:
Laukurinn, gulræturnar og hvítkálið/rósakálið er allt skorið í bita eftir smekk. Því næst er laukurinn brúnaður aðeins við lágan hita áður en afganginum er bætt við ásamt bolla af vatni og kraft.

Næst er rétturinn kryddaður til og kókosrjómanum bætt við. Þessu er svo leyft að malla á meðan lagt er á borð. Í stíl við látlausan rétt tók ég myndina af mat kvöldsins á vinnuborðinu hjá mér, allt í drasli nóg að hneykslast fyrir þá sem það vilja.

Hrísgrjóna Pilaf

Það er eflaust einhver hræsni af minni hálfu að vera með uppskriftablogg, því ekkert er að mínu mati leiðinlegra en að elda eftir uppskrift.

Auðvitað er það svo að þær eru góður grunnur og gott að hafa til stuðnings, sumir eru þó svo hræddir við að breyta. Ég vona þó að fólk sjái það á uppskriftunum að það má alveg breyta ( þess vegna alltaf þessir svigar ).

En ég á nokkrar uppskriftabækur sem ég les og hugsa mikið um. Guðmunda mamma Birgittu gaf mér bók sem heitir Matreiðslubók úr jurtaréttum. Í henni eru nokkrar uppskriftir og í dag ákvað ég að prófa eina. Hún er hér aðeins breytt þó.

Innihald:
2 Bollar af vatni
2 Tsk kraftur ( eða eftir smekk )
Bolli af hrísgrjónum lögð í bleyti
Fínt brytjaður laukur
1 stk Paprika ( græn eða rauð ).
1 Bolli soyjahakk ( hugsa að venjulegt hakk sé fínt líka en þá piprað aðeins til að minka fitubragðið )
1/2 bolli af brytjuðum möndlum
Slatti af ferskum eða þurrkuðum Basil

Aðferð:
Látið hrísgrjónin liggja yfir nótt í bleyti. Soyjakjötið er líka gott að hafa lagt í bleyti áður. Saxið laukinn og paprikuna fínt ásamt basil ef þú ert með ferskar kryddjurtir.

Eldfast mót er smurt með vænni slettu af olíu og öllu er þessu blandað saman áður en sett er í ofn á 150C – 200C þar til hrísgrjónin eru alveg soðin.

Þetta bar ég fram með einhverri sósu sem mér þykir góð.

Sveppa stir’fry með Brasilíuhnetu og Malt Extrakt

Mig hefur lengi langað að prófa að nota Egils Malt í matargerð og í kvöld ákvað ég að gera tilraun. Ég eldaði Sveppa stir’fry með Brasilíuhnetum og maltsósu.

Ég gerði nokkur mistök og því er uppskriftin hér örlítið breytt frá því sem ég borðaði í kvöld og þið sjáið á myndinni. Rétturinn er nokkuð sterkur en bragðast stórvel. Ég ætla samt að gera breytingar og reyna að elda hann aftur og þá kannski með fisk eða escargo. Set þá uppskrift inn þegar við Birgitta borðum hana.

Birgitta var að vinna í kvöld, þess í stað fékk ég matargest sem einnig heitir Birgitta og er 10 mánaðar. Ég þorði nú ekki að gefa henni að smakka því eins og ég sagði var maturinn sterkur í kvöld. Þess í stað fékk hún bara sveppi, hrísgrjón og vínber. Held að henni hafi líkað nokkuð vel.

Innihald:
100 g. Brasilíuhnetur
1 stk. Stór Laukur
3 stórar Gulrætur
1 stk Paprika rauð eða gul
500 g. Sveppir
100 – 200 ml. Malt
100 ml. Kókosrjómi eða Beljurjómi
10 – 20g Ferskur Basil
Sletta af Sítrónusafa
Chillipipar
Soyjasósa
Grænmetiskraftur
Ég notaði Ólífuolíu

Aðferð:
Byrjið á því að leggja Brasilíuhneturnar í bleyti, það er gott að gera það daginn áður en þið sleppið alveg með að gera það bara strax í byrjun matseldar.

Skerið laukinn í tvennt og svo í sneiðar, gulræturnar eru skornar í bita eftir smekk, ég skar þá í ca. 1 sentímetra teninga. Paprikuna skerið þið svo í bita. Þetta er allt sett á pönnu og fær að brúnast aðeins í olíunni á lágum hita.

Næst er hnetunum bætt útí ásamt glasi af vatni, ég skar þær í þrennt áður en það er ekki nauðsynlegt. Þessu er leyft að malla þar til vatnið hefur gufað upp og mýkt hneturnar.

Næst er maltinu helt ut í. Þið ráðið hvort það eru 100 – 200 ml. eftir því hvort þið viljið mikla sósu eða litla. Fínsöxuðum basil er bætt útí og smá slettu af ólífuolíu. Leyfið grænmetinu að taka í sig bragði í nokkrar mínútur. Maltið freyðir aðeins sem er eðlilegt.

Rjómanum er svo bætt við ásamt smá grænmetiskraft, sítrónusafa og sveppum. Skerið sveppina í tvennt eða fernt eftir stærð. Það er allt í lagi að nota sveppi úr dós en ég ráðlegg ykkur að nota þá heila sveppi. Síðast er smá chillipipar bætt útí til að gera réttinn aðeins sterkari og vinna á móti sæta bragðinu af maltinu.

Hrærið í þessu og leggið á borð. Ég bar þetta fram með hrísgrjónum.

Ofnbakað grænmeti með basil og steinselju

Ég eldaði frekar seint í kvöld, ég er búinn að vera að vinna mjög mikið og sofa lítið þannig að ég lagði mig seinni partinn og vaknaði ekki fyrr en á miðnætti. Glorhungraður en ekkert í sérstöku stuði til að fá mér mikla og þunga máltíð.

Ég ákvað að gera ofnbakað grænmeti, með basil, steinselju og hvítlauk.

Með þessu gerði ég svo sósu en hún er ekki nauðsynleg.

Þetta ætti að vera nóg fyrir tvo.

Innihald:
1 stk. lítil sæt kartafla
2 stk. stórar gulrætur
200 g. Sveppir
4 Hvítlauksrif
Ólífuolía
Ferskur Basil og Steinselja eftir smekk
Grófur Pipar

Aðferð:
Skerið sætu kartöfluna í litla kubba ( sentimeter að stærð ). Sveppirnir eru skornir í fernt og svo gulræturnar í bitastærð eftir því smekk. Ég star gulræturnar í stóra bita því mér finnst ágætt að þær séu ekki alveg linar. Allt er þetta sett í eldfast mót með heilum hvítlauksrifum.

Hellið vel af Ólífuolíu yfir þetta allt og bætið fínsöxuðum basil og steinselju, hrærið vel saman. Piprið aðeins eftir smekk.

Setjið í ofn á 150g í ca. 40 mín, en athugið hvort sætu kartöflurnar séu orðnar mjúkar. Ef ekki leyfið þá að vera aðeins lengur.

Innihald: Sósa
1 stk. Laukur
50 g Hnetur
Ferskar kryddjurtir af eigin vali
1/2 Dós af Kókosmjólk ( 300 ml mjólk eða rjóma )
Teskeið Grænmetiskraft
Ólífuolía

Aðferð:
Saxið kryddjurtirnar og skerið laukinn í tvennt og svo í sneiðar. Allt er þetta sett í pottinn með hnetunum og steikt örlítið á lágum hita.

Næst er kókosrjómanum bætt við og örlítið af kraft. Þetta fær að malla aðeins þar til sósan hefur tekið bragð.