Kjúklingasúpa með sýrðum rjóma og tortillaflögum

Það var margt um manninn hjá okkur í kvöld. Helga systir Birgittu og vinir hennar voru að hjálpa henni að flytja. Eftir marga tíma af púli var loks boðið upp á kvöldmat. Í matinn var kjúklingasúpa með sýrðum rjóma og tortillaflögum.

Frekar auðvelt að elda, og auðvelt að nota bara það sem er til, en hér er uppskrift kvöldsins. Alls borðuðu sex hjá okkur og þessi uppskrift nægir fyrir þann fjölda. Það voru smá afgangar þannig að ég myndi alveg vera óhræddur við að bjóða 6 – 8 í mat.

Innihald:
2 stk Lauk
1 matskeið af Rauðri Chillipúrru
50g. Spínat
1 stk Paprika
1/3 Hvítkálshaus
200g Tómatar
2 bollar Smjörbaunir ( ca. 1 dós )
2-3 Kjúklingabringur
2 Dósir Kókosmjólk ( 800ml. )
Pipar, basil og grænmetiskraftur
Ég nota Ólífuolíu

Meðlæti:
Tortillaflögur
Sýrður rjómi

Aðferð:
Ef þið notið þurkaðar smjörbaunir þarf að leggja þær í bleyti daginn áður og sjóða svo í um það bil klukkutíma. Ef það er búið þá er bara að fara í að saxa niður allt grænmetið. Byrjið á að skera laukinn og paprikuna í bitastærð eftir smekk. Saxið svo spínatið niður. Þessu er svo öllu skellt í pottinn með olíu og steikt saman á lágum hita ásamt pipar eftir smekk.

Á meðan er hægt að saxa niður hvítkálið og bæta við blönduna. Hrærið vel í þessu í 2 – 3 mín. Næst er vatni bætt við þartil það þekur rétt yfir allt grænmetið. Því næst er krafti og basil bætt við og hrært öllu saman. Kjúklingabringurnar eru svo lagðar ofan á þetta allt og lok sett á pottinn. Leyfið þessu að malla í ca. 30 mín. Þetta gefur kjúklingabringunum gott bragð þar sem þær gufusjóða í súpugrunninum.

Þegar bringurnar eru orðnar eldaðar í gegn eru þær teknar úr pottinum og skornar í bita. Ég hef bitana oftast í stærra lagi.

Að lokum er svo kókosmjólkinni bætt útí og hrært við. Þessu er svo leyft að malla í aðrar 10 mín. Áður en þetta er borið fram er gott að smakka súpuna og krydda til.

Fyrir þá sem vilja eru tortillaflögurnar brotnar niður og settar í súpuna ásamt sýrðum rjóma.

Pizza með hvítlauk og spínat

Systir hennar Birgittu borðaði með okkur í kvöld. Þegar við Birgitta bjuggum úti áttum við það til að kaupa pizzu með spínat og hvítlauk. Það er varla hægt að segja að við söknum mikið af mat frá Bretlandi, þó eru nokkrir veitingastaðir sem maður saknar að fara og borða á. Fæstir þeirra eru reyndar Breskir, við bjuggum svo vel að búa í innflytjendahverfi þar sem hægt var að fá mat frá öllum heimsálfum. Hefðbundið Breskt mataræði var því aldrei til staðar hjá okkur.

Við ákváðum í kvöld að gera tilraun til að elda þessa pizzu sem við keyptum svo oft. Hún tókst nokkuð vel en var þó ekki alveg eins. Það kemur bara í næstu tilraun.

Við keyptum tilbúið pizzudeig þótt einfalt sé að gera það sjálfur. Við eigum ekki til kökukefli þannig að ég notaði rauðvínsflösku til að fletja deigið vel út. Pizzan er best ef hún er þunn, þetta virkar illa sem einhverskonar hleifur með dóti ofaná, eins og er svo algengt með pizzur á Íslandi.

Þetta myndaðist ekki nógu vel en bragðast ágætlega, ekki láta myndina stoppa það að uppskriftin sé prófuð.

Innihald:
50 g Spínat
2 lauf af hvítlauk
Pipar og örlítið af basil ef er til
Pizzasósa á botninn
Rifinn Ostur
Ég nota ólífuolíu

Aðferð:
Saxið spínatið niður ásamt hvítlauknum og steikið létt á pönnu með pipar og ólífuolíu. verið dugleg að hræra í þessu til að það brenni ekki við. Á meðan er hægt að hnoða botninn og fletja út.

Stillið ofninn á 150C undir og yfir, og leyfið ofninum að hitna. Á meðan er gott að setja sósuna á botninn, því næst er spínat og hvítlauknum dreift jafnt yfir og að lokum rifnum ost, ásamt smá basiliku.

Massa góð pizza.

Pasta með spínat og papriku

Síðasta þriðjudag var pasta í matinn hjá mér. Það er einfalt að elda og ódýrt. Birgitta var farin í vinnuna þannig að ég eldaði bara fyrir sjálfan min. Uppskriftin er fyrir einn.

Innihald:
Væn lúka af Spínat
1 stk. Rauð paprika
1 bátur af hvítlauk
1 bolli af pasta ( ég notaði pene )
2 bollar vatn
Í gær átti ég smá blómkál sem ég vildi nota og bætti við, það er ekki nauðsynlegt
Kraftur og pipar
Ég nota Ólífuolíu

Aðferð:
Skerið Spinatið, hvítlaukinn og paprikuna niður í litla bita og steikið á pönnu við lágan hita. Piprið aðeins til. Eftir nokkrar mínútur er svo tveim bollum af vatni ásamt pastanu bætt við. Þessu er hrært saman.

Næst er lokið sett á pönnuna og þessu leyft að malla þartil pastað er soðið.

Gott að bera þetta fram með hvítlauksbrauði.

InDefence kássa úr Íslensku rótargrænmeti, framreidd með rembing og lýðskrum

Icesave er heitasta málefnið þessa dagana. Ólafur Ragnar hefur boðað til blaðamannafundar í fyrramálið þar sem hann ætlar að greina frá ákvörðun sinni. Ég ákvað í tilefni þess að gera kássu sem er svo stútfull af þjóðarembingi að hægt er að fá nánast allt í hana án innflutnings. Kássuna skýri ég í höfuð InDefence.

Kássan er ódýr að vanda og þægileg ef ekki er stemming fyrir mikilli máltíð. Gott að venja sig á nægjusemi sem fyrst ef af verður að forseti skrifar ekki undir Skítsæmileg er í raun besta orðið til að lýsa henni.

Uppskriftin er fyrir einn.

Innihald:
1 stk. Laukur
3 stk. Gulrætur
150 g. Hvítkál eða rósakál
1 bolli Mjólk, Rjómi eða Kókosmjólk
1 bolli vatn
Grænmetiskraftur
Grófur pipar og Chillipipar
Ég nota ólífuolíu en hvers vegna ekki að tapa sér og nota bara innlendan tólg!

Aðferð:
Laukurinn, gulræturnar og hvítkálið/rósakálið er allt skorið í bita eftir smekk. Því næst er laukurinn brúnaður aðeins við lágan hita áður en afganginum er bætt við ásamt bolla af vatni og kraft.

Næst er rétturinn kryddaður til og kókosrjómanum bætt við. Þessu er svo leyft að malla á meðan lagt er á borð. Í stíl við látlausan rétt tók ég myndina af mat kvöldsins á vinnuborðinu hjá mér, allt í drasli nóg að hneykslast fyrir þá sem það vilja.

Hrísgrjóna Pilaf

Það er eflaust einhver hræsni af minni hálfu að vera með uppskriftablogg, því ekkert er að mínu mati leiðinlegra en að elda eftir uppskrift.

Auðvitað er það svo að þær eru góður grunnur og gott að hafa til stuðnings, sumir eru þó svo hræddir við að breyta. Ég vona þó að fólk sjái það á uppskriftunum að það má alveg breyta ( þess vegna alltaf þessir svigar ).

En ég á nokkrar uppskriftabækur sem ég les og hugsa mikið um. Guðmunda mamma Birgittu gaf mér bók sem heitir Matreiðslubók úr jurtaréttum. Í henni eru nokkrar uppskriftir og í dag ákvað ég að prófa eina. Hún er hér aðeins breytt þó.

Innihald:
2 Bollar af vatni
2 Tsk kraftur ( eða eftir smekk )
Bolli af hrísgrjónum lögð í bleyti
Fínt brytjaður laukur
1 stk Paprika ( græn eða rauð ).
1 Bolli soyjahakk ( hugsa að venjulegt hakk sé fínt líka en þá piprað aðeins til að minka fitubragðið )
1/2 bolli af brytjuðum möndlum
Slatti af ferskum eða þurrkuðum Basil

Aðferð:
Látið hrísgrjónin liggja yfir nótt í bleyti. Soyjakjötið er líka gott að hafa lagt í bleyti áður. Saxið laukinn og paprikuna fínt ásamt basil ef þú ert með ferskar kryddjurtir.

Eldfast mót er smurt með vænni slettu af olíu og öllu er þessu blandað saman áður en sett er í ofn á 150C – 200C þar til hrísgrjónin eru alveg soðin.

Þetta bar ég fram með einhverri sósu sem mér þykir góð.

Sveppa stir’fry með Brasilíuhnetu og Malt Extrakt

Mig hefur lengi langað að prófa að nota Egils Malt í matargerð og í kvöld ákvað ég að gera tilraun. Ég eldaði Sveppa stir’fry með Brasilíuhnetum og maltsósu.

Ég gerði nokkur mistök og því er uppskriftin hér örlítið breytt frá því sem ég borðaði í kvöld og þið sjáið á myndinni. Rétturinn er nokkuð sterkur en bragðast stórvel. Ég ætla samt að gera breytingar og reyna að elda hann aftur og þá kannski með fisk eða escargo. Set þá uppskrift inn þegar við Birgitta borðum hana.

Birgitta var að vinna í kvöld, þess í stað fékk ég matargest sem einnig heitir Birgitta og er 10 mánaðar. Ég þorði nú ekki að gefa henni að smakka því eins og ég sagði var maturinn sterkur í kvöld. Þess í stað fékk hún bara sveppi, hrísgrjón og vínber. Held að henni hafi líkað nokkuð vel.

Innihald:
100 g. Brasilíuhnetur
1 stk. Stór Laukur
3 stórar Gulrætur
1 stk Paprika rauð eða gul
500 g. Sveppir
100 – 200 ml. Malt
100 ml. Kókosrjómi eða Beljurjómi
10 – 20g Ferskur Basil
Sletta af Sítrónusafa
Chillipipar
Soyjasósa
Grænmetiskraftur
Ég notaði Ólífuolíu

Aðferð:
Byrjið á því að leggja Brasilíuhneturnar í bleyti, það er gott að gera það daginn áður en þið sleppið alveg með að gera það bara strax í byrjun matseldar.

Skerið laukinn í tvennt og svo í sneiðar, gulræturnar eru skornar í bita eftir smekk, ég skar þá í ca. 1 sentímetra teninga. Paprikuna skerið þið svo í bita. Þetta er allt sett á pönnu og fær að brúnast aðeins í olíunni á lágum hita.

Næst er hnetunum bætt útí ásamt glasi af vatni, ég skar þær í þrennt áður en það er ekki nauðsynlegt. Þessu er leyft að malla þar til vatnið hefur gufað upp og mýkt hneturnar.

Næst er maltinu helt ut í. Þið ráðið hvort það eru 100 – 200 ml. eftir því hvort þið viljið mikla sósu eða litla. Fínsöxuðum basil er bætt útí og smá slettu af ólífuolíu. Leyfið grænmetinu að taka í sig bragði í nokkrar mínútur. Maltið freyðir aðeins sem er eðlilegt.

Rjómanum er svo bætt við ásamt smá grænmetiskraft, sítrónusafa og sveppum. Skerið sveppina í tvennt eða fernt eftir stærð. Það er allt í lagi að nota sveppi úr dós en ég ráðlegg ykkur að nota þá heila sveppi. Síðast er smá chillipipar bætt útí til að gera réttinn aðeins sterkari og vinna á móti sæta bragðinu af maltinu.

Hrærið í þessu og leggið á borð. Ég bar þetta fram með hrísgrjónum.

Ofnbakað grænmeti með basil og steinselju

Ég eldaði frekar seint í kvöld, ég er búinn að vera að vinna mjög mikið og sofa lítið þannig að ég lagði mig seinni partinn og vaknaði ekki fyrr en á miðnætti. Glorhungraður en ekkert í sérstöku stuði til að fá mér mikla og þunga máltíð.

Ég ákvað að gera ofnbakað grænmeti, með basil, steinselju og hvítlauk.

Með þessu gerði ég svo sósu en hún er ekki nauðsynleg.

Þetta ætti að vera nóg fyrir tvo.

Innihald:
1 stk. lítil sæt kartafla
2 stk. stórar gulrætur
200 g. Sveppir
4 Hvítlauksrif
Ólífuolía
Ferskur Basil og Steinselja eftir smekk
Grófur Pipar

Aðferð:
Skerið sætu kartöfluna í litla kubba ( sentimeter að stærð ). Sveppirnir eru skornir í fernt og svo gulræturnar í bitastærð eftir því smekk. Ég star gulræturnar í stóra bita því mér finnst ágætt að þær séu ekki alveg linar. Allt er þetta sett í eldfast mót með heilum hvítlauksrifum.

Hellið vel af Ólífuolíu yfir þetta allt og bætið fínsöxuðum basil og steinselju, hrærið vel saman. Piprið aðeins eftir smekk.

Setjið í ofn á 150g í ca. 40 mín, en athugið hvort sætu kartöflurnar séu orðnar mjúkar. Ef ekki leyfið þá að vera aðeins lengur.

Innihald: Sósa
1 stk. Laukur
50 g Hnetur
Ferskar kryddjurtir af eigin vali
1/2 Dós af Kókosmjólk ( 300 ml mjólk eða rjóma )
Teskeið Grænmetiskraft
Ólífuolía

Aðferð:
Saxið kryddjurtirnar og skerið laukinn í tvennt og svo í sneiðar. Allt er þetta sett í pottinn með hnetunum og steikt örlítið á lágum hita.

Næst er kókosrjómanum bætt við og örlítið af kraft. Þetta fær að malla aðeins þar til sósan hefur tekið bragð.

Chilli-tómatsúpa með smjörbaunum og rófum

Það var elduð súpa frá grunni í kvöld. Birgitta er búin að vera að heima og ég er búinn að vera að vinna mikið þannig að ekki hafði fengist tími til að versla neitt. Ég ákvað að hlaupa í búð og versla eitthvað. Ég var kominn í búðina þegar áttaði mig á því að ég var bara með 1100 kr. á mér.

Við áttum til lauk, hvítlauk og hálfa rófu en fleira held ég að hafi ekki verið til á heimilinu af ferskvöru. Ég ákvað því að kaupa eitthvað en eins og áður sagði var með lítinn pening á mér. Fyrir 700 kr. gat ég keypt ferska steinselju, örlítið af sveppum, papriku, agúrku, smjör og pakka af flatkökum.

Með matnum vorum við með flatkökur og salat, að drekka var svo bara kalt Rauðrunnate, mjög gott.
Í salatinu var ég með steinselju, gúrku og appelsínugula papriku allt skorið mjög smátt ég hafði gert ráð fyrir að setja furuhnetur í þetta en komst svo að því ( mér til mikillar skelfingar auðvitað ) að þær voru búnar. Ef þið eigið pakka af furuhnetum skellið þeim í salatið.

Uppskriftin er góð fyrir 2 – 4 ( við eigum afganga til að hita á morgun )

ATH: Ég er nokkuð viss um að þetta er líka góður grunnur af sjávarréttasúpu ef þið eigið fisk, rækjur og annað sjávarréttabland er tilvalið að prófa.

Innihald:
1/2 stór Rófa eða ein lítil
1 stk Púrrulaukur ( notið bara 3 venjulega ef ekki til )
3 Hvítlauksrif
Lítil dós af Tómatpúrru ( eða fimm stórir tómatar maukaðir )
400 g. Tilbúnar Smjörbaunir ( 100 g lagðar í bleyti )
1/2 Lítri Beljumjólk eða Kókosmjólk
1 msk. Grænmetiskraftur
20 g. Ferskur Basil ( eða þurrkaður eftir smekk )
Chillipipar og pipar eftir smekk
Smá slettu af soyjasósu og ég notaði ólífuolíu

Aðferð:
Ég skar púrrulaukinn í tvennt langsum eftir stilknum og skolaði að innan. Ástæðan er sú að púrrulaukur er oftast troðfullur af mold að innan. Svo skar ég hvorn helming aftur langsum í tvennt og skar í sentímeters bita.

Næst tók ég olíuna og setti þannig að olían fyllti nokkurn vegin botninn, lauknum bætti ég svo við og ásamt hvítlauk sem ég fínsaxaði og fínsöxuðum basil ( átti reyndar bara þurrkaðan í dag ). Pipraði örlítið og leyfði þessu að steikjast aðeins í pottinum á lágum hita.

Ég bætti svo 1/2 lítra af vatni útí og tómatpúrru, ég myndi ráðleggja þeim sem nota ferska tómata að gera þetta öfugt og bæta tómötunum fyrst og leyfa þeim að malla aðeins með lauknum áður en vatninu er svo bætt við.

Því næst skar ég rófuna í teninga og bætti í súpuna ásamt smjörbaununum ásamt teskeið af kraft og örlítið af chillipipar. Ég bætti svo aftur hálfum lítra af vatni áður en ég bætti kókosmjólkinni í súpuna. Hún tekur þá á sig þennan ljóta bleika lit sem oft fylgir tómatsúpum. Ég bætti því smá slettu af soyjasósu sem um leið dekkir hana aðeins.

Það er voðalega gott að leyfa þessu að malla í 40 – 60 mín. Það þarf þó ekki að vera yfir þessu á meðan. Ég þynnti svo súpuna með vatni til að ná henni eins og ég vildi og bætti við pipar og chilli þar til ég var sáttur.

Súpan breytir aðeins um lit á því að malla það er alveg eðlilegt, bara litarefnið í rófunum.

Pizza með furuhnetum og klettasalati

Sæl/l aftur og afsakið langa bið. Ástæðan fyrir því að uppskriftir hafa ekki verið að koma hérna inn er einfaldlega vegna þess að netið er ekki að virka vel á Mánagötunni. Það er verið að vinna í því að laga þetta en þangað til verður þetta að vera svona. Það er synd vegna þess að bloggið voru nokkrir farnir að heimsækja. Ég vona bara að þeir sem lásu áður séu ekki búnir að gefast upp og komi aftur. Ég geri ráð fyrir að þetta verðir farið að virka í næsta mánuði.

Uppskrift kvöldsins er af Pizzu með klettasalati og furuhnetum. Reyndar er pizzan á myndinni með spínat og ástæðan er sú að við áttum ekki klettasalat. Spínat er allt í lagi en ekkert sérstakt.

Þar sem það eru bara við Birgitta á heimilinu þá keyptum við tilbúið deig. En ég geri ráð fyrir að það sé mun ódýrara fyrir fjölskyldu að gera sitt frá grunni.

En allavega þessi pizza hefði vel dugað fyrir þrjá en við slátruðum henni tvö.

Innihald:
Pizzasósa
200 g. Rifinn ostur
Ferskur parmesan
50 – 100 g Furuhnetur
Klettasalat
Þurrkaðar kryddjurtir, t.d. Basil og pipar fyrir þá sem vilja.

Skellið sósunni á eftir smekk. Gott að hafa í huga að sósan lekur alltaf í miðjuna og því þarf ekki að setja eins mikið þar og annarstaðar á botninum. Stráið rifna ostinum jafnt yfir botninn, mér finnst betra að hafa frekar þunnt lag af ost á þessari pizzu en þið ráðið þessu.

Næst er svo furuhnetunum stráð yfir, oftast set ég vel af þeim. Því næst er skerum við Pharmesan bitan í örþunnar sneiðar og dreifum yfir pizzuna eftir smekk. ATH: Parmesan-inn á ekki að þekja pizzuna alla heldur er til að gefa ákveðið bragð.

Basil eða pipar ef þið viljið.

Setið í ofninn á undir og yfir 150C og leyfið að bakast þar til pizzan er orðin tilbúin, 20 – 40 mín. Þegar pizzan er komin úr ofninum er góðu lagi af Klettasalati stráð yfir.

Skerið í sneiðar og berið fram

Matarboð á Mánagötu: Kjúklingalundir með hnetukarrísósu, kúskús og sætum kartöflum

Jæja þá kom að því að eldaður væri kjúklingur. Við Birgitta fengum gesti í kvöld. Helgu systur Birgittu ásamt Freyju og Birgittu litlu ( jamm það er önnur Birgitta ). Við svo hátíðlegt tilefni gleymum við öllu grænmetisætu hippa tali og höfum yfirleitt fisk eða kjúkling. Held að það sé óhætt að segja að aldrei sé rautt kjöt vegna þess að ég hef bara ekki hugmynd hvernig á að eldað það. Hver veit samt á næstunni ætla ég að gera tilraun til að elda spendýr ( enda karlmenni … KARLMENNI!!! sem borðar kjöt ).

Í kvöld vorum við fjögur ásamt barni. Uppskriftin nægði fyrir okkur fjögur og rúmlega það. Reyndar eru bæði Helga og Birgitta miklar sósu konur og því gerði ég gríðarlegt magn af sósu og það var eitthvað eftir. Sjáum til á morgun hvað ég geri við þá afganga.

Þess má geta að Birgitta kláraði Kúskúsið áður en ég náði að taka myndina. Tóma plássið á disknum er því fyrir kúskús. Ég notaði bara pakka kúskús í kvöld og því fylgir ekki uppskrift af því. En fljótlega hendi ég inn einhverjum kúskús rétt.

Skemmtileg staðreynd: Kúskús kemur fjórum sinnum fyrir í þriðju málsgrein þessarar færslu.

Innihald: Kjúklingalundir
1 kg. Kjúklingalundir ( Þarf varla að segja þetta en að vanda er sveigjanleikinn í fyrirrúmi á þessu bloggi. Notið bara kjúkling hvaða part sem er eða þess vegna fisk ).
Ólífuolía til að þekja yfir kjúklinginn
Eðal-Kjúklingakrydd frá Pottagöldrum ( Sítrónupipar er líka brill! )

Aðferð:
Hreinsið og skolið kjúklinginn ( þið sem nennið því, geri það eiginlega aldrei nema í kvöld ). Kjúklingurinn er svo settur í lokað ílát og kryddaður nokkuð vel og ólífuolíu hellt útá til að þekja kjötið. Smá innskot, þetta er reyndar líka góð aðferð til að lengja líftíma á hráu kjöti um nokkra daga, þ.e. að marinera það.

Lokið boxinu og skellið í ísskápinn. Það er auðvitað best að gera þetta daginn áður en auðvitað gleymdi ég því og gerði þetta því ekki nema klukkutíma fyrr. Það er allt í lagi en kjötið tekur betur bragð ef það fær meiri tíma.

Setjið pönnuna á lágan hita og skellið öllu heila klabbinu á pönnuna ( olíu og kryddi ). Þegar kjúklingurinn er svo tilbúinn þá er honum bara hent í skál og eitthvað yfir. Því næst er það sósan.

Innihald: Hnetukarrísósa með sveppum
200 g. Sveppir
100 g. Hnetur (Kashjú hnetur eru brilliant en annars bara hvaða hnetur sem er … )
160 – 250 ml Kókosrjómi ( á ég að segja það … eða rjómi )
1 kúfull matskeið af hnetusmjöri
Kraftur
Grófur Pipar og Karrí

Aðferð:
Skerið sveppina í bita. Ég skar þá í sneiðar og svo í tvennt. Setjið hneturnar í skál ásamt vatni sem hylur þær. Gott ef hneturnar eru í bleiti í smá tíma. Skellið sveppunum á pönnuna ( Já! Sýnið þeim hver ræður ). Sveppirnir fá þá að brúnast aðeins áður en hnetunum er hennt á pönnuna með vatninu.

Þegar þetta er farið að krauma er karríinu bætt útí eftir smekk ásamt pipar. Þegar vökvinn hefur svo gufað upp er kókosrjómanum bætt útí ásamt hnetusmjörinu. Gott að hræra svolitið vel í þessu öllu svo hnetusmjörið bráðni og blandist vel.

Smakkið … geðveikt ekki satt? Svo er það bara loka fínisering. Ef súpan er ekki nógu bragðmikil er kraft bætt útí og meira karrí ef ykkur finnst það vanta.

Þá er hún tilbúin alveg geðveik Hnetukarrísósa með sveppum!

Í kvöld gerði ég líka sætarkartöflur með basil. Það hefði verið best að eiga ferskan basil en úrvalið í búðinni var svo skítlélegt að það hvarflaði ekki að mér að borga 400 kall fyrir “ferskan” basil sem klárlega átti að vera kominn á helmings afslátt. En þær eru einfaldar að gera fyrir þá sem vilja.

Innihald: Sætar kartöflur með basil.
1 stk. Sæt karftafla
gott búnt af ferskum basil ( eða þurrkaður basill eftir smekk )
Olífuolía

Aðferð:
Saxið basilinn í smátt. Næst er sæta kartaflan afhýdd og skorin i teninga eða franskar ( franskar í kvöld ). Ég lagði þær í skál og skvetti olíu og basil yfir klukkutíma áður en ég eldaði þetta. En það skiptir ekki öllu.

Því næst er öllu skellt á pönnu og steikt í u.þ.b. 3 – 4 mín. áður en glasi af vatni er bætt útí og þessu leyft að malla þar til vökvinn hefur gufað upp.

Ég smakkaði einu sinni appelsínu og sætar kartöflur mús, helv … gott þarf bara að finna út hvernig það var gert og kannski seinna í vetur verður þannig með mat.

Með þessu var svo salad sem er orðið daglegt á þessu heimili. Verði ykkur að góðu og heyrumst á morgun með uppskrift sem verður byggð á afgöngum af sósunni. Veit ekki enn alveg hvað en sjáum til.